PRINT KOMENTO

]Biberaj mban fjalim në Komitetin e Monitorimit të KE-së në Ukrainë

Zëvendëspresidenti i Asamblesë Parlamentare të Këshillit të Evropës, deputeti i Partisë Demokratike, Aleksandër Biberaj, është shprehur në mbledhjen e Komitetit të Monitorimit të KE-së se Shqipëria i plotëson të gjitha kushtet për të kaluar në fazën e postmonitorimit. Gjatë mbledhjes së zhvilluar në Kiev të Ukrainës, Biberaj është shprehur se në Shqipëri janë ndërmarrë një sërë reformash të rëndësishme, të cilat kanë sjellë jo vetëm marrjen e ftesës për anëtarësim në NATO, por dhe kanë shtuar mundësitë për hapjen e negociatave për anëtarësim me BE-në vitin tjetër. Duke folur për Progres raportin e Monitorimit të Asamblesë Parlamentare të KE-së, lidhur me funksionimin e institucioneve demokratike në Evropë, Biberaj është përqendruar në progresin e bërë dhe ecurinë e reformave në Shqipëri. Në fjalën e tij, Biberaj ka nënvizuar klimën e mirë politike që ekziston në Shqipëri, si dhe rritjen e bashkëpunimit ndërmjet mazhorancës dhe opozitës, gjë që ka sjellë edhe rritjen e rolit të Parlamentit në jetën politike dhe në kryerjen e këtyre reformave. Më tej, Biberaj është përqendruar tek ecuria pozitive e reformës zgjedhore, duke vënë theksin tek përgatitjet që po bëhen për hartimin e saktë të listave të votuesve, për prodhimin e kartave të identitetit si dhe të pasaportave biometrike, elementë mjaft të rëndësishëm këto, që kanë të bëjnë me zhvillimin e zgjedhjeve elektorale të vitit 2009.